Над Битола повторно гори. Силниот ветер повторно ги разгоре жариштата, префрлајќи го огнот на другата страна од планината кон месноста викана „Снегово“. Заради силината на огнот и ветрот, за тешко пристапниот терен, пак е побарана, а и е добиена воздушна поддршка од шест летала. Паралелно се врши и координација со ОКШ за повторено вклучување на сите расположливи сили и ресурси, согласно потребите, ни изјави за Алфа, градоначалникот на Битола, Тони Коњановски, кој инаку цело време е на терен.
Заради екстремно неповолните временски услови и постоењето на голем број жаришта, целиот опожарен терен продолжува будно се контролира, а заради густиот чад, обиколницата од Битола кон Ресен и понатаму останува затворена за сообраќај, а возилата се пренасочуваат низ Битола, која исто така од синоќа е обвиена во чад.
Првичните претпоставки се дека пожарот кој избувна вчера нешто пред 17 часот на ридот над Битола од тунелот кон Бензиската „Лукоил“ и се прошири високо во планината кон месноста викана „Бел камен“, најверојатно бил предизвикан од човечки фактор, односно од палење на дива депонија во околината на населбата „Баир“, што не е првпат.
Инаку, битолчани ноќеска имаа тешка и непроспиена ноќ. Голем дел од нив доброволно, самоорганизирајќи се, постојано одеа кон пунктовите на пожарникарите, снабудавјќи ги со вода и храна. Во гаснењето на големиот шумски пожар, кој според првчните проценки „проголта“ над 100 хектари, главно нискостеблеста вегетација, но и шума од бор самоник и багрем, учествуваа 50 професионални пожарникари, како и доброволци од јавните претпријатија, од национални шуми, а и локално население.
Пожарот во Битола, пред повторно да се активира попладнево, целосно беше ставен под контрола околу пладне, благодарение на воздушната поддршка составена од пет ЕР-трактори, од кои три од Дирекцијата за заштита и спасување и два од Турција како дел од помошта која стигна за справување на Македонија со пожарите.
Каролина Дурло
