Исчезна картата од Голема Албанија од музејот на УЧК во Сопот. Картата пред која се поклони лидерот на ДУИ Али Ахмети, а предизвика бура реакции во јавноста. Како и кога ја снемало засега останува непознато. Нов момент е дека наводно ДУИ немале ништо со тој објект, Али Ахмети бил само поканет како гостин и присуствувал таму, барем според министерот за надворешни работи Бујар Османи.
-Не се работи за музеј на УЧК како што беше претставен, туку музеј кој што одбележува настани од 1944, кога се убиени, кога се убиени селани од Сопот во 44-та година. Господин Ахмети беше таму како гостин, како поканет гостин, така да сите прашања ќе треба да ги пратите до организаторите, изјави Османи.
Разногласие меѓу институциите има и околу тоа дали земјиштето каде што е изграден музејот е државно или приватно. Од Општина Куманово велат било на државата, од централната власт било приватно. Тоа прво ни го кажа премиерот Ковачевски, а сега и Османи, барем според она што тој го знаел.
-Според мои информации, тие викаат дека тоа е семејно земјиште, семејството тоа го изградило, за да се одбележи со соселаните, изјави Османи.
Инаку, на отворањето на музејот со кој наводно ДУИ нема ништо, Ахмети испрати пораки дека во минатото имале желба Македонија да биде дел од Албанија без граници, но тие амбиции се промениле поради променетите политички околности. Сепак, реши да се пофали дека успеале Албанците да ги направат државотворен народ и господари во Македонија.
Матеја Петровски
