Излегов да берам дренки и кога по пат седнав да се одморам од нигде никаде пред мене излезе мечката, сведочи 76-годишниот Минче Рамчески од селото Пласница, кај Македонски Брод кој бил нападнат од мечка. Раскажува дека откако го легнала на земја, мечката со заби го фатила за левата слабина, го држела кратко, а потоа избегала. Така, вели Минче, останал здрвен некое време, по што се освестил.
- „Полека со стапчето појдов и стигнав до Горно село, тоа старо село е. Тука барав дренки, најдов по некоја и седнав на патот. Го оставив стапчето и запалив цигара. Така си седев кога одеднаш, не знам како се најде тука, одеднаш пред мене се појави мечката. Ме турна, ме легна долу и јас само се фатив вака, се пазев. Сакав да ѝ дадам отпор ама не можев, што да правам. Се исплашив многу“, вели 76-годишникот што вчера беше нападнат од мечка.
Во разговор со директорот на Центарот за управување со кризи, Стојанче Ангелов, Рамчески вели дека гледтката била страшна. Нападот се случил рано утрината околку 8:30 часот кога излегол од дома и тргнал да бере дренки.
- „Кога ме турна почнав да викам ‘помош, помош, помош’. Не ме држеше многу, не поминаа три секунди и веднаш си замина. Бев многу исплашен, ми течеше крв. Така останав здрвен некое време, па се освестив“. Државата треба да има право на отстрел на мечките кои напаѓаат“, вели човекот.
76-годишниот Минче за среќа го спасиле ловџии кои случајно се нашле блиску до местото на инцидентот бидејќи биле на лов. Откако слушнале повици за помош ловците испукале неколку истрели во воздух, по што мечката побегнала, а нападнатиот човек се здобил со тешки телесни повреди.
Инаку, селата Пласница и Ораоец, на чиј потег беше нападнат 76-годишникот, се оддалечени на околу 70 километри од Националниот парк „Маврово“ од каде што мечките во последно време почнаа зачестено да се симнуваат во населените места во потрага по храна. Претходно, на крајот на септември општина Маврово и Ростуше побара Владата да прогласи кризна состојба на целата територија на општината поради зголемено присуство на мечки на овие простори и опасноста по локалното население.
Борис Грујоски
