Власта ја праќа власта во опозицијата. И тоа е возможно во овие околности во Македонија. Алијанса за Албанците, коалициониот партнер на ДУИ и СДСМ, смета дека интегративците со кои ги договараат сите владини одлуки, треба да ја напуштат Владата. Ова ни го соопшти министерот за информатичко општество Азир Алиу кој е дел од партијата на Арбен Таравари.
-Треба да се ‘апдејтираат’ и да одат во опозиција. Треба да ја актуелизираат опозицијата, опозицијата е здрава. Пишман не, само требаше повеќе да се трудиме отколку ако имавме четиригодишен мандат, изјави Алиу.
Првиот дипломат и партиски заменик на Ахмети во ДУИ, пак не гледа никаков проблем. Одлично соработувале во владината коалиција и немало причина за некаква паника, друго воопшто не сакал да коментира.
-Во Влада немаме никакви разлики, најсоодветно комуницираме, соработуваме сите министри дали од Алијанса, дали од ДУИ, дали од СДСМ. Така да апсолутно немам приметено никаква разлика дали во ставови или забелешки во однос на работењето на било кој од коалиционите партнери. Мислам дека тоа е важно, останатото нема да го коментирам. Важно е дека имаме добра меѓучовечка релација, добра соработка, изјави Османи.
Овие сценарија во владината коалиција доаѓаат на само неколку месеци пред претседателските и парламентарни избори, во моменти кога рејтингот на сите владејачки партии, меѓу кои се и ДУИ и Алијанса е во слободен пад.
Матеја Петровски
