Повеќе од 71 милиони луѓе се заразиле со коронавирусот ширум светот од почетокот на епидемијата. Речиси 50 милиони се излекувале, а еден милион и шестотини илјади ја изгубиле битката со опасниот вирус. Во моментот активни се над 20 милиони случа, а 106 илјади од нив, се во критична состојба имајќи предвид дека бројките се менуваат од час во час.
САД сè уште имаат најголем број смртни случаи и заразени во светот. Американските здравствени власти, транспортните компании и болниците се подготвени итно да започнат досега невидена кампања за масовно вакцинирање, откако федералните регулатори ја одобрија првата вакцина против ковид-19.
Претседател Доналд Трамп најави дека вакцинацијата ќе започне за помалку од 24 часа, откако и Агенцијата ќе издаде дозвола за итна употреба на вакцината од американската фармацевтска компанија „Фајзер“ и германската „Бионтек“.
„Имам многу добри вести. Денеска нашата нација постигна медицинско чудо. Направивме безбедна и ефикасна вакцина за само девет месеци. Ова е едно од најголемите научни достигнувања и успеси во историјата. Ќе спаси милиони животи и наскоро ќе ѝ стави крај на пандемијата“, порача Трамп.
Велика Британија до сега вакцинираше десетици илјади луѓе.
А во земјите од ЕУ додека се чека одобрувањето, германската канцеларка Ангела Меркел апелираше да се намалат социјалните контакти за време на Божиќ.
Меркел која во јавните обраќања е секогаш прибрана и студена, овој пат со емотивен настап, скоро на раб на солзи.
Бројот на контакти е преголем, намалувањето на контактите не е доволно. Извинете, навистина ми е жал од дното на моето срце, но ако цената што ја плаќаме е 590 смртни случаи на ден, тогаш според мене тоа е неприфатливо.. Ако имаме премногу контакти пред Божиќ и на крајот тоа е последниот Божиќ со нашите баби и дедовци, тогаш ќе сториме нешто погрешно. Не треба да дозволиме тоа да се случи – рече Меркел во германскиот парламент.
А од земјите во регионот Србија се подготвува за вакцинација. Тамошните власти објавија дека првите вакцини ќе бидат доставени пред крајот на годината.
Таа вакцина навистина ќе ја имаме во декември оваа година, порача српската премиерка.
А Во Хрватска на полноќ стапија на сила нови мерки. Според новите правила, продавниците што имаат простор до 10 метри квадратни можат да имаат по еден клиент.Трговските центри треба да имаат за секој потрошувач најмалку 16 метри квадратни.
