Министерот за правда Јетон Шасивари, во рамки на работната посета на Германија, остварил средба со Анете Краме, парламентарна државна секретарка во Сојузното министерство за правда и заштита на потрошувачите на Германија.
Како што соопшти Министерството за правда, на средбата во фокусот биле актуелните реформски процеси во правосудството, зајакнувањето на владеењето на правото, независноста и ефикасноста на правосудните институции, како и предизвиците во спроведувањето на реформите согласно европските стандарди.
Посебно внимание било посветено на продлабочувањето на билатералната соработка, размената на експертски искуства и примената на добрите практики од германскиот правосуден систем.
Министерот Шасивари ја истакнал значајната улога на Германија како партнер во европскиот интеграциски процес, нагласувајќи дека реформите треба да донесат суштински промени во функционирањето на институциите.
-Успехот на правосудните реформи не се мери само според бројот на донесени закони, туку според нивната примена во пракса. Нашата цел е правосуден систем што обезбедува правна сигурност, еднаков третман пред законот и поголема доверба на граѓаните во институциите – истакнал министерот Шасивари.
На средбата била нагласена важноста од континуирана институционална соработка и поддршка во процесот на усогласување на националното законодавство со европските стандарди.
Министерството за правда продолжува со активностите за унапредување на меѓународната соработка, со акцент на спроведување конкретни реформски резултати и зајакнување на владеењето на правото.
