Општините Битола, Ресен, Демир Хисар, Новаци и Могила обезбедија и ќе доделат финансиска поддршка за учениците во прво одделение. Највисока еднократна парична помош ќе добијат родителите чии првачиња ќе учат во основните училишта во Општина Новаци каде тамошната локална самоуправа одлучи да додели ваучер од 10.000 денари за првачињата, но и по 6.000 денари за учениците од второ до деветто одделение.
Општина Могила ја зголеми ланската финансиска поддршка и годинава ќе исплати по 9.000 денари за секое прваче, а Општина Демир Хисар ќе додели по 7.000 денари за секој ученик кој годинава е запишан во прво одделение.
Над сто првоодделенци во пет основни училишта на територијата на Општина Ресен оваа година ќе добијат по 5.000 денари, потврдија за МИА од тамошната локална самоуправа, а Општина Битола на родителите на 666 првоодделенци ќе им додели по 3.000 денари еднократна парична помош.
Финансиската поддршка на семејствата кои имаат првоодделенци е континуирана и секоја година општините од Пелагонискиот плански регион ги доделуваат како мерка за намалување на трошоците во првата училишна година.
