Вакцинацијата против сезонски грип започнува утре (21 октомври), а за потребите на Центарот за јавно здравје (ЦЈЗ) Кочани се обезбедени 2.500 дози вакцини. Вакцинацијата ќе се спроведува во пунктовите во Кочани, Виница, Берово и Делчево.
Како што информира специјалистот д-р Мартин Павлов, раководител на ЦЈЗ Кочани, граѓаните кои се пријавиле за вакцинација и добиле термин преку системот „Мој Термин“ ќе можат да се вакцинираат согласно добиените известувања.
Бесплатната вакцинација е наменета за ризичните групи, меѓу кои се лицата на возраст над 65 години, лицата со хронични заболувања, здравствените работници, бремените жени, децата на возраст од шест месеци до пет години, како и лицата сместени и вработените во установите за социјална заштита на стари лица.
