Инфраструктурни инвестиции тешки 11 ипол милиони евра за Општина Карпош. Владата најавува нов инвестициски циклус во една од најурбаните општини во Скопје, а дури 5,5 милиони евра доаѓаат директно од министерството за транспорт. Најголем акцент ќе биде ставен на подобрување на инфраструктурата, уредување на јавните простори и решавање на долгогодишните проблеми со паркингот.
„Ќе помогнеме во реализација на плоштади, во реализација на улици, атмосферска канализација, фекална канализација и уредување на просторот таму каде што е најпотребно во општината. Исто така, како што кажа градоначалникот, зборувавме за решение на свлечиштата особено во делот кој што гравитира кон населбите Козле, понатаму Трнодол, Жданец, да се санира целиот тој простор ” изјави вицепремиерот Александар Николоски.
Приоритет останува решавањето на недостигот од паркинг места во скопски Карпош. Очекувањата се дека во следните две до три години граѓаните ќе имаат обезбедено доволно места за паркирање и ќе можат без проблем да ги паркираат своите возила.
„Тука работиме заедно со Јавното претпријатие за стопанисување со станбен и деловен простор, на изнаоѓање на едно интегрирано решение кое што треба да значи решение на проблемот со паркинг преку изведба на катни гаражи кои што ќе бидат достапни за граѓаните, исто така подземно паркирање, подземни катни гаражи кои што ќе значат од една страна зеленило, паркови, а од друга страна решавање на проблемот со паркирање.“– изјави Николоски.
Дел од проектите веќе се во завршна фаза, додека за останатите се изработува проектна документација. Реализацијата ќе се одвива во соработка меѓу Владата, Општина Карпош и Јавното претпријатие за стопанисување со станбен и деловен простор. Целта е и полесно секојдневие за жителите на Карпош.
