Во делови на Париз и неколку други градови во Франција синоќа беше во сила полициски час, како мерка за смирување на хаосот и тензиите по неколкудневните насилни немири, грабежи и судири со полицијата. Безбедносната криза доби и политички размери, откако министерот за внатрешни работи, Лоран Нуњез, понудил оставка, признавајќи дека полицијата во одредени градови ја изгубила контролата врз ситуацијата. Претседателот Емануел Макрон, сепак, одбил да ја прифати. Јавните собири во делови од Париз се ограничени, а до шест часот утринава полицискиот час беше во сила на Плоштадот на Републиката и во трговската област Ле Ал. Станува збор за локации на кои за време на викендот биле регистрирани насилство и грабежи. Властите наведуваат дека мерките имаат цел да спречат нови напади врз продавници и јавни објекти.
Ограничувања се воведени и во други француски градови. Во Лил и неколку градови на северот на земјата синоќа и денеска е во сила полициски час за малолетници под 18 години, од 20 до 6 часот. Во Ница полицискиот час за малолетници започнува во 21 часот, додека во Марсеј се забранети јавните собири и демонстрациите на територијата на целиот град од пладне до 20 часот. Францускиот премиер Себастијан Лекорни побарал од локалните власти да воведуваат ограничувања само во подрачјата погодени од насилство.
