Во Кочани денеска продолжи расчистувањето на остатоците од невремето на повеќе локации, меѓу кои и потегот од „Лукоил“ до СОУ „Гошо Викентиев“, како и просторот во самото средно училиште, информираат надлежните служби на Општина Кочани.
Во активностите на терен се вклучени Општина Кочани, КЈП „Водовод“, ЈП „Национални шуми“ – Подружница Кочани и ТППЕ – Кочани. Паралелно се работи и на санирање на останатите пријавени проблеми предизвикани од невремето.
Градоначалникот Владко Грозданов претходно со изјава објавена на фејсбук профилот на Општината соопшти дека невремето што беснееше дваесетина минути на 29 август вечерта во Кочани оштети неколку автомобили, куќи останаа без кровови и олуци, водоснабдувањето неколку часа беше во прекин. Делови на неколку помали места и денеска се без електрична енергија.
Од Општина Кочани апелираат до граѓаните на трпение и разбирање до комплетното санирање на состојбата.
