Вештачката интелигенција и дата центрите се новата нафта во светот и Македонија не смее да го испушти тој историски момент, кој ќе и овозможи долгорочен економски раст, порача премиерот Христијан Мицкоски.
Тој, истовремено, упати остри критики кон одредени структури во општеството кои според него свесно го кочат развојот на земјата.
Премиерот Мицкоски посочи дека сите проекти мора да се реализираат со целосно почитување на законските прописи и заштита на животната средина, но, нагласи дека противниците на овие инвестиции делуваат со сомничави мотиви.
-Лично мислам дека одредени структури во општеството имаат поинаква цел, а најмалку да ги заштитат интересите на граѓаните. Истите тие кои беа најгласни против инвестициите во антимонот и златото, сега се против и за дата центрите. Во суштина, тие се против тоа Македонија да се развива. Кога целиот свет граба кон вештачка интелигенција, имаме луѓе кои за одредена донација или грант од сомнителни извори се обидуваат да ни го поматат умот со нелогични изјави. Развојот на човештвото е неповратен процес и јас апсолутно стојам зад тоа дека дата центрите треба да се градат“, изјави Мицкоски во одговор на новинарско прашање по увидот во реализираните инвестиции и модернизацијата на Управата за хидрометеоролошки работи (УХМР).
