Брисел внимателно ја следи состојбата со рекордно нискиот водостој на Дунав, кој го загрозува производството на електрична енергија во делови од Централна и Источна Европа.
Европската комисија го следи влијанието врз нуклеарните централи во Романија, Унгарија и Бугарија и предупредува дека сушите и топлотните бранови мора да бидат земени предвид при идното планирање на енергетските капацитети.
Во Романија веќе е исклучен еден реактор во Чернавода, а постои ризик да биде запрен и вториот, што би погодило околу 20 отсто од производството на електрична енергија во земјата.
И Унгарија се соочува со проблеми во нуклеарната централа Пакш, која поради недостигот на вода значително го намали производството.
Европските власти предупредуваат дека климатските промени и почестите суши претставуваат сè поголем ризик за европската енергетска безбедност.
