Инфлацијата на стабилно ниво и покрај поскапувањето на нафтата и на транспортот. За само еден месец, речиси и да не се забележуваат промени, трошоците за живот се зголемени за минимални 0,1%. Она што радува е тоа што, во јули храната и безалкохолните пијалоци поевтиниле за 1,1%. Кај земјоделските производи има пад од нешто над 3%. Поевтинување има и кај прехранбените, индустриските производи и пијалоците. Минимално намалување од 0,2% има кај облеката и обувките. Пад од 1,4% има во делот покуќнина и одржување на домаќинства. Инфлацијата е најмногу резултат на поскапиот транспорт за 4,4%.
Инфлацијата во јули е 2,3% на годишно ниво. Ова е намалување, бидејќи во јуни беше 3,4% споредено со истиот месец лани.
Од Mинистерството за економија и труд задоволни што храната поевтинува веќе втор месец по ред. Велат дека редовно ги следат движењата на цените преку анализите на набавните ирподажните цени на бруто-профитните маржи.
„Државниот пазарен инспекторат продолжува со редовни и засилени инспекциски контроли за да се спречат евентуални злоупотреби и неоправдани поскапувања. Во моментов, официјалните показатели не упатуваат на потреба од воведување нови интервентни мерки, бидејќи ценовните движења се стабилни, а кај најзначајната категорија – храната, веќе втор месец по ред се бележи намалување на цените“ – велат од Mинистерството за економија и труд.
За Министерството за финансии, намалувањето на инфлацијата е уште еден охрабрувачки сигнал за движењата во економијата.
„Во април, инфлацијата на годишно ниво изнесуваше 5,7%, во мај 4,8% и во јуни 3,4%. Покрај намалувањето на инфлацијата, раст бележат и извозот, индустриското производство и вработеноста, што укажува дека економските политики даваат резултати. Тоа се потврдува и со растот на даночните приходи заклучно со јули“ – велат од Министерството за финансии.
Надлежните велат дека доколку се појават нови неоправдани ценовни шокови или нарушување на пазарот, ќе реагираат навремено и ќе ги искористат сите механизми што стојат на располагање за заштита на куповната моќ на граѓаните.
