За три месеци јавниот долг намален за 21 милион евра. Најновните податоци од министерството за финансии се дека тој на крајот на јуни изнесува 58,8% од БДП , при што се забележува пад од 0,1п.п. во вториот квартал споредено со првиот. Јавниот долг континуирано се намалува и споредено со крајот на 2024-та, има пад од 2,6 п.п., а од крајот на минатата година е помал за 0,6 п.п. Вкупниот јавен долг е 10,7 милијарди евра. Министерката за финансии Гордана Димитриеска Кочоска објаснува дека во периодот од април до јуни бил исплатен износ од над 300 милиони евра за сервисирање на дел од Еврообврзницата од 700 милиони евра издадена во 2020 година. Поголемиот дел од оваа Еврообврзница беше сервисиран во првиот квартал.
„Верувајте, не е едноставно цело време да се движите со ниво на јавен долг околу 60% од БДП и да се борите да не го надминете тој праг. Животниот стандард е да имаме добри болници, да имаме добри патишта, добри железници. Значи ако правилно ги насочуваме парите, можеби во некој момент ние може да излеземе од таа психолошка граница, како што излегле многу земји, но многу е важно да расте економијата и тоа во последните години се случува “ – Гордана Димитриеска Кочоска , министер за финансии.
Граѓаните очекуваат задржување на животниот стандард во услови на постојани поскапувања кај горивата. Владата располага со широк спектар на мерки кои може да ги активира меѓу кои и намалување на ДДВ. Податоците за пораст на трошоците за живот ќе бидат објавени наскоро, а ќе се анализира и Извештајот на Државниот пазарен инспекторат на цени на 700 прехранбени производи.
„Очекувам набргу да биде објавен податокот за инфлацијата во јули. Но врз основа на податоците што ги добивам од Државниот пазарен инспекторат, очекувам сосема поинакви приоритети “ – вели Христијан Мицкоски – претседател на Влада.
Министерството за финансии вели дека продолжува со фискалната консолидација и рационалното трошење на државните пари. Со ребалансот за годинава не се планирани нови задолжувања вон планираните, а се намалуваат и ставките за стоки и услуги. Министерката рече дека јавниот долг до крајот на 2026-та ќе биде под границата на 60% од БДП.
