Цените на горивата конечно ќе се намалат следната недела, а Македонија ќе остане меѓу државите со најниска инфлација во регионот. Премиерот Мицкоски вели дека лично направил анализа на цените. Задоволен е како се одржува ценовната стабилност на пазарите и нагласува дека во јуни годинава, инфлацијата од 3,4% била четирипати помала од онаа во јуни во 2022-та кога беснееше војната во Украина. Трошоците за живот помалку пораснале само во Албанија и Србија, додека другите држави се зад Македонија.
„Ако тогаш сме имале 14,7 проценти инфлација, сега е 3,4 проценти. Ако тогаш прехранбените производи биле над 15 проценти и биле главниот носител, сега тие се со 2,5 проценти. Јас очекувам дополнително стабилизирање во јули. Во 2022-та сме биле на осмото место според висината на инфлација, а сега сме на трето. Пред нас се благо Србија и Албанија, но зад нас се сите останати држави од регионот, од Турција, преку Бугарија, Романија, Грција, Косово, Црна Гора, Босна и Херцеговина, Хрватска, Словенија и така натаму“ – рече Мицкоски.
Премиерот очекува и надолно нивелирање на цените на дизелот и бензините на стартот на август. И покрај постојаните промени неделава, нафтата од типот брент во моментов е за 10 долари по барел поевтина од крајот на тргувањето во петокот. Досега намлените акцизи и ДДВ го чинеа буџетот десетици милиони евра помалку.
„Прерано е да зборува, денеска имаме мал скок, вчера цените за брентот се движеа 83, 84 долари за барел, денеска повторно имаме нагорно придвижување, од 87, 88, но далеку под 100. Очекувам веќе в понеделник да имаме надолно нивелирање на цените на бензините и на дизелот. Важно е што како држава остануваме со најевтина цена на дизелот и на безоловниот бензин имајќи предвид дека ова се производи кои се купуваат на берза, односно сите држави ги купуваат од исто место. Нема тука голема мудрост во делот кој е поголем или помал претприемач или поголем или помал државник, само што ние како Влада одлучуваме да се откажеме голем дел од она што некои други држави не го направија, а тоа е акцизи, а се откажавме и од данокот на додадена вредност. Остануваме со таа политика и во периодот што следи очекувам повторно надолно нивелирање на цените“ – изјави Мицкоски.
Владата има простор за интервенција со нови мерки, бидејќи кризната состојба важи до 20-ти октомври. Премиерот претходно најави дека следната недела ќе се анализира дали има потреба од намалување на ДДВ кај горивата. Изминатиов месец, цената на дизелот „скокна“ за 18, а на бензините за 9 денари по литар.
