Силен ветер, пороен дожд и град за неколку минути направија пустош низ Струмица , Делчево, Радовиш, Дојран и Куманово. Урнати дрвја и бандери, уништени возила и оштетени електрични кабли се само дел од последиците што зад себе ги остави невремето. Градоначалникот на Делчево во изјава за Алфа вели дека невремето предизвикало голема штета. Во градот има големи наноси на кал, земја и паднати дрвја:
Е настаната материјална штета во градот, овде станува пред се збор за оштетени кровни конструкции на колективни станбени згради и на семејни домови, имаме на повеќе места веќе регистрирано такви проблеми, од каде што граѓани бараат помош и поддршка за расчистување на паднатите ќерамиди и на паднатиот лим. – изјави Иван Гоцевски, градоначалник на Делчево.
Надлежните велат дека како локална самоуправа активно работат на терен за расчистување на ситуацијата.
Нашите екипи на Јавното претпријатие Брегалница од Делчево и на нашата територијална противпожарна единица работат на терен и веќе се нормализира ситуацијата и се очекува до крајот на денот да ја ставиме комплетно под контрола. – порачува Гоцевски.
Последици од невремето има и во останатите погодени подрачја, меѓу кои штети на инфраструктурата, паркирани возила и прекини на снабдувањето со електрична енергија. Локалните и комунални служби преземаат активности за нормализирање на состојбата, а првичните проценки за материјалните штети ќе бидат познати откако ќе завршат увидите на надлежните служби.
