Државната изборна комисија на денешната деветта седница едногласно ја усвои Годишната програма за едукација на другите чинители на изборите во и вон изборниот процес.
Претседателот на Државната изборна комисија, Бојан Маричиќ рече дека главна цел на оваа програма е да се зајакне интегритетот, транспарентноста и јавната доверба во изборниот процес преку континуирана едукација и надвор од изборниот период.
Тој појасни дека активностите се насочени кон клучните чинители: медиумите, граѓанските организации, политичките партии, независните кандидати, со цел унапредување на нивната улога и квалитетот во известувањето. Посебен фокус се става на специфични групи на гласачи: млади, жени, лица со попреченост и лица во установи за вонсемејна грижа, за да се овозможи нивно правилно и непречено учество на изборите.
– Знаете дека Државната изборна комисија вложува многу внимание на едукацијата и затоа ова е еден важен дел, една важна компонента на нашата работа – истакна тој.
На денешната седница на ДИК, усвоени беа и правилникот за начинот на вршење на попис и усогласување на сметководствената состојба на средствата и обврските со фактичката состојба на Државната изборна комисија, процедурата за начинот на вршење попис и усогласување на сметководствената состојба на средства и обврски со фактичката состојба во Државната изборна комисија.
Беа усвоени повеќе одлуки за изменување и дополнување на одлуки за утврдување на облик и содржина на печатите и штембилите кои ги користи ДИК, општинските изборни комисии, Изборната комисија на Град Скопје. Исто така, замена и утврдување на обликот на печатот од избирачките места во надлежност на конкретни општински изборни комисии.
