Судскиот совет на денешната седница ги усвои измените и дополнувањата на годишната програма за работа за 2026 година, при што како една од клучните цели е утврдено зајакнувањето на довербата на јавноста и судството во непристрасноста и професионалноста на Советот.
На седницата беше избрана и новата претседателка на Основниот кривичен суд Скопје. По спроведена постапка по јавен оглас и усвоен извештај на Комисијата за избор, за претседателка беше избрана судијката Даниела Димовска, која досега ја извршуваше функцијата вршител на должност претседателка на судот.
Димовска пред една година беше избрана за в.д. претседателка на Основниот кривичен суд Скопје, а претходно работеше како судијка во Одделението за организиран криминал и корупција при истиот суд.
Членовите на Судскиот совет, кои ја поддржаа нејзината кандидатура, како предности ги посочија визијата за раководење со судот, иновативниот пристап содржан во програмата за работа, менаџерските способности и резултатите постигнати во периодот додека ја извршуваше функцијата в.д. претседателка.
На денешната седница Советот ги усвои и записниците од 542. и 546. седница, одлучуваше по барања за надомест на трошоци поврзани со вршењето на судиската функција за судии делегирани во други судови, а избра и разреши повеќе судии поротници.
Под точката Разно, Судскиот совет ја избра Арлинда Кадри-Шахиновиќ за нов член на комисијата за избор на претседател на Управниот суд, на местото на Павлина Црвенковска, на која ѝ престана мандатот како член на Советот, а други членови на комисијата се Ивица Николовски и Исамедин Лимани.
Седницата продолжи со формирање комисии на известители по барања за утврдување одговорност на судија, односно претседател на суд, каде што јавноста е исклучена.
