Образованието и науката се столб на развојот, а во изминатите две години се преземени низа реформи за подобрување на квалитетот на наставата и поддршка на учениците и студентите. Ова го истакна министерката за образование и наука Весна Јаневска на отчетот за сработеното во првите две години од мандатот. Како дел од реформите е обезбедена поголема поддршка за талентираните ученици, унапредено е стручното образование со вклучени околу 1.000 компании, а воведено е и кариерно советување во основните и средните училишта.
„Во основното и во средното образование воведовме кариерно советување, односно насочување на учениците, што им го олеснува изборот на понатамошниот личен развоен пат. Ова се еден дел од целите од реформската агенда кои успешно ги исполнивме, за што Министерството треба да добие средства од ЕУ во висина од 19 милиони евра.“, изјави Весна Јаневска.
Воведени се нови категории и поголем број стипендии, како и олеснети услови за нивно добивање. Започната е обнова на образовната инфраструктура, во која се инвестирани околу 70 милиони евра за повеќе од 90 проекти, како реконструираните студентски домови „Стив Наумов“ и „Кузман Јосифовски Питу“, кои повторно ќе ги отворат вратите од октомври.
„Овозможивме образование во хибриден формат за учениците кои се на подолго болничко или домашно лекување – решено барање по цели 15 години. Ја зголемивме поддршката на воспитно-образовниот процес на помалите заедници, како ромската заедница, преку зголемување на бројот на образовни медијатори во основното и средното образование.“, изјави Весна Јаневска.
Буџетот за високото образование и науката е значително зголемен, а во 2025 година се издвоени над 370 милиони денари за научноистражувачки проекти. Јаневска нагласи дека платите на наставниците во првите две години се зголемени за 20 проценти, а предвиден е раст и до 60 проценти во наредните четири години.
