Билатералните односи меѓу Скопје и Софија, ескалираат. Ова е оценката од министерот Муцунски, и покрај зачестените средби на македонски и бугарски претставници. Објавувањето на доверлива дипломатска нота со безбендони детали за патувањето на семејството на премиерот предизвика дипломатска криза. Македонските власти бараат истрага и извинување од Бугарија оценувајќи го чинот како сериозен преседан. Шефот на македонската дипломатија веќе го повикал бугарскиот амабасадор Радуков на разговор во МНР и побарал објаснување и соседите да се извинат.
„Јас да бев, мене да ми се случеше ова, ќе се извинев. Тоа е за нас еден неприфатлив начин на меѓусебно функционирање посебно кога се во прашања движења на членови на семејства на државни функционери. Безбедноста е прв приоритет. И на територијата на нашата држава постојано се случува да се движат членови на семејства на високи странски претставници, сами странски претставници, некогаш и во приватни цели“, вели министерот.
Муцунски е загрижен за односите меѓу Скопје и Софија, истакнувајќи дека е потребен европски дух од двете страни за меѓусебното функционирање на двете држави.
- „Тоа што ме загрижува е еден тренд на ескалација, треба да работиме на деескалација, треба да работиме на градење на доверба, но не су ултиматуми и не со наметнување на вистина којашто е лажна, изјави Муцунски“.
Шефот на македонската дипломатија е песимист за работата на заедничката историска комисија, бидејќи како што појасни таа би имала резултати само доколку Гоце Делчев и Јане Сандански бидат прогласени за Бугари, нешто кое е ноторна лага, вели Муцунски.
На прес-конференција посветена на двегодишниот мандат, министерот истакна дека институцијата работела со јасно дефинирани цели насочени кон зајакнување на меѓународните партнерства, подобрување на надворешнополитичката позиција на државата и обезбедување конкретни придобивки за граѓаните.. Биле реализирани повеќе од 110 работни посети во странство, повеќе од 400 средби и состаноци, од кои над 210 билатерални средби со државници, министри и високи претставници од целиот свет, додека државата била домаќин на повеќе од 40 европски и светски лидери и високи претставници.
