Во Домот на културата во Македонска Каменица денеска се одржа првата презентација на проектот „Енергетско ефикасни домови“, што општината го реализира во партнерство со Здружението за хумано домување „Хабитат Македонија“.
Како што информираше градоначалничката Соња Стаменкова, со проектот започнува процес насочен кон подобрување на условите за домување, зголемување на енергетската ефикасност и намалување на трошоците за енергија за граѓаните.
– Во првата фаза ќе бидат опфатени колективните станбени објекти, а нашата цел е во следниот период поддршката да ја прошириме и кон индивидуалните домови – изјави Стаменкова.
Таа потенцираше дека за реализација на проектот ќе бидат обезбедени рекордни средства на државно ниво, наменети за реконструкција на кровни конструкции и изградба на енергетски ефикасни фасади на станбените објекти во општината.
Според неа, инвестициите во енергетската ефикасност претставуваат вложување во иднината, преку подобрување на квалитетот на живот, намалување на трошоците за домаќинствата и создавање почиста животна средина.
Од Општина Македонска Каменица најавуваат дека ќе продолжат со реализација на проекти кои носат долгорочни придобивки за граѓаните и придонесуваат за унапредување на условите за живеење.
