Артим Ислами, дипломиран правник со положен правосуден испит од Струга, и Феузи Џафери, дипломиран правник со положен правосуден испит од гостиварското село Чајле, се кандидатите кои собраниската Комисија за прашања на изборите и именувањата ги предложи за нов член на Судскиот совет што го избира Собранието.
Претседателот на Комисијата, Ѓорѓија Сајкоски, информираше дека на конкурсот биле пријавени 10 кандидати, од кои при проверката членовите на Комисијата за селекција утврдиле дека тројца кандидати не ги исполнуваат условите, а за седумте кандидати кои ги исполнувале условите се спроведе јавна расправа за нивно претставување.
Испразнетото место доаѓа по истекот на вториот мандат, лани во декември, на членот на Судскиот совет, Селим Адеми. Ова место е резервирано за припадниците на заедниците кои се над 20 проценти.
Критериумите во огласот беа кандидатите да бидат од редот на универзитетски професори по право, адвокати, поранешни судии на Уставниот суд, на меѓународни судови и други истакнати правници.
За оваа функција не можат да се кандидираат актуелни судии или обвинители, но и лица што се разрешени од функциите.
