Во Општинското основно училиште „Дедо Иљо Малешевски“ во Берово се одржа училишниот форум „Зелено и енергетски ефикасно училиште“, во рамки на регионалниот проект „Зелена генерација“, имплементиран од Националниот младински совет на Македонија со поддршка на Фондацијата Отворено општество.
Форумот имаше за цел да вклучи што поголем број учесници кои сакаат активно да придонесат во создавање поодржлива иднина, преку предлагање и реализација на иницијативи за справување со климатските предизвици.
-Во текот на дискусијата беа изнесени повеќе конструктивни идеи, меѓу кои поставување сензорни славини за заштеда на вода, реконструкција на дел од кровот, поставување канти за селекција на отпад, изработка на проект за фотоволтаичен систем, изградба на бушотина за вода, уредување урбана градина, како и воведување систем за собирање дождовница и соларен систем за топла вода, информираа од училиштето.
Според заклучоците од форумот, најголема поддршка од учесниците доби идејата за поставување сензорни славини, како практично и одржливо решение за рационално користење на водните ресурси во училиштето.
Настанот помина во позитивна атмосфера, со активна вклученост на учениците и наставниците, кои ја истакнаа заедничката заложба за создавање поеколошко, енергетски ефикасно и одржливо училиште.
