Поради реконструкција на улицата „Моша Пијаде“ во Куманово граѓаните не треба да ги паркираат возила на местата каде што се изведуваат градежните работи, повикаа денеска од општината.
Оттаму велат дека пристапот на возила ќе биде отежнат, сè до обезбедување на услови за повторен проток на сообраќајот. Оваа процедура, како што додаваат, е неопходна заради обезбедување безбедноста при движење на граѓаните и возилата, како и заради безбедно и непречено извршување на градежните работи.
-Во претстојниот период ќе се отстранува постојаната асфалтна конструкција и ивичниците по целата ширина и скоро цела должина на улицата, наведуваат од општината.
Во мометот се реализира втоа фаза од реконструкцијата на улицата „Моша Пијаде“ во Куманово. Реконструкцијата се спроведува во неколку фази што придонесува за привремени застои, но обезбедува долгорочна функционалност на сообраќајницата. Претходно, беше поставена водоводната инсталација, следува атмосферската канализација и горниот слој. Во рамки на проектот, Општина Куманово располага со околу два милиона евра обезбедени од Светска банка. Досега се реализирани околу 1,3 милиони евра и преостануваат приближно 700.000 евра за завршување на планираните активности. Проектот опфаќа реконструкција на фекалната и водоводната мрежа на дел од улицата, во должина од околу 490 метри, од почетокот на улицата до крстосницата со „Пиринска Македонија“. Дополнително, со средства од буџетот на Општината се финансира уредувањето на подземната инфраструктура, вклучително и атмосферската канализација, која ќе се реализира во две фази, како и реконструкција на постоечката мрежа долж целата улица во должина од 1.400 метри.
