Претседателот на Собранието на Македонија, Африм Гаши, денеска остварил средба со генералниот секретар на Парламентарното собрание на Организацијата за црноморска економска соработка (ПАБСЕК), Асаф Хаџиев.
Како што соопшти собрниската прес-служба, на средбата била потврдена добрата и континуирана соработка меѓу Собранието и ПАБСЕК, при што соговорниците разменија мислења за актуелните регионални и меѓународни предизвици, како и за улогата на парламентарната дипломатија во унапредувањето на дијалогот, довербата и регионалната соработка.
Претседателот Гаши ја истакнал посветеноста на Собранието кон активното учество во работата на ПАБСЕК и ја нагласи важноста на организацијата како значајна платформа за парламентарна соработка и поврзување на регионот со европските политички и економски процеси.
Генералниот секретар Хаџиев изразил задоволство од можноста за оваа средба и ја поздрави активната улога на Собранието на Македонија во рамките на ПАБСЕК. Тој нагласи дека соработката меѓу ПАБСЕК и Делегацијата на Собранието во ПАБСЕК е на високо ниво, оценувајќи ја како динамична, конструктивна и значајна за натамошното унапредување на работата на организацијата.
На средбата присуствуваше и генералната секретарка на Собранието Марина Димовска, која информирала за тековните активности на Собранието, нагласувајќи ја важноста на ПАБСЕК како значајна платформа за парламентарна соработка, размена на искуства и унапредување на регионалниот дијалог.
Соговорниците ја потврдиле заедничката заложба за натамошно продлабочување на соработката и зајакнување на парламентарниот дијалог во рамките на ПАБСЕК. Воедно, беше изразено уверување дека добрите партнерски односи ќе продолжат да се развиваат во духот на меѓусебна доверба, разбирање и заеднички интерес.
