Ученици и наставници од 15 основни скопски училишта, денеска, во просториите на Министерството за енергетика, рударство и минерални суровини ги претставија своите проекти на тема „Зелената енергија е иднината – а нашата иднина се децата“ на настанот кој се организираше по повод 1 Јуни-Меѓународниот ден на детето.
Користејќи обновливи извори на енергија, учениците и наставниците ги прикажаа своите уникатни идеи, меѓу кои впечатливи макети, како мини еко-системи, самоодржливи урбанистички решенија и иновативни проекти за рециклирање.
На конкурсот беа избрани три најкреативни решенија. Првото место им припадна на учениците и наставниците од ООУ „Крсте Мисирков“ од општината Гази Баба, додека второто и третото место го добија учениците и наставниците од ООУ „Дане Крапчев“ од општината Гази Баба и ООУ „Петар Поп Арсов“ од општина Карпош.
Министерката за енергетика, рударство и минерални суровини, Сања Божиновска на настанот им честиташе на сите ученици и наставници за нивните уникатни идеи.
– Се надевам дека вашите креативни решенија ќе станат реалност – им порача министерката Божиновска, истакнувајќи го напредокот на нашата земја во однос на искористеноста на обновливите извори на енергија. Министерката, притоа, ја нагласи важноста на зелената енергија за граѓаните, појаснувајќи ги нејзините придобивки.
Први јуни – Меѓународниот ден на детето, прогласен од УНИЦЕФ во 1925 година на Светската конференција за благосостојба на децата одржана во Женева, традиционално се одбележува во многу земји во светот, со цел да се истакне важноста од грижата, развојот и поддршката на децата.
Министерството за енергетика, рударство и минерални суровини со денешниот настан се придружува кон глобалното одбележување на Меѓународниот ден на детето, како дел од нашите заложби за поддршка на младите и нивното знаење и создавање услови за воспоставување на стабилен и сигурен енергетски систем преку поголема интеграција на обновливите извори на енергија.
