Стоп за врсничкото насилство и училишта каде нема да стравуваат за својата безбедност, е пораката што преку танцување, група ученици заедно со професорите, ја испратија до пратениците во Собранието.
- ,,Ние децата сме сегашноста, а и побитно иднината на светот и нашиот правилен развој значи и правилен развој на иднината на која што сите ќе треба да бидеме дел, затоа е многу битно сега децата да растат во здрави услови и да се намали влијанието на сајбер булингот” рече Андреј Симјанов, ученик во гимназијата Јосип Броз Тито.
Тие им порачаа на институциите дека заслужуваат безбедни простори каде може да се движат и апелираа до институциите проблемите со врсничкото насилство посериозно да бидат сфатени.
- ,,Ние возрасните, со нашите постапки секојдневно им даваме пример на нашите млади како да се однесуваат меѓусебе. Секојдневието на нашите деца е исполнето со примери како некој возрасен од ситуација на моќ си дозволува да прави навреди, мобинг на работно место, за жал да бидат сведоци како им повишува глас со навреди и други несакани работи” изјави Грозданка Саздова, професор во гимназијата ,,Јосип Броз Тито”.
- ,,Живееме во свет полн со насилство и сето тоа се пресликува во училиштата. Нашите ученици заслужуваат безбедна училишна средина, а тоа може да го постигнеме само ако заедно родители, наставници и институции изградиме средина на мир, почит и љубов” потенцираше Валентина Штерјовска, професор во гимназијата во Гостивар.
Надежта е дека пораката ќе допре до оние за кои е наменета, оти на овој општествен проблем треба да се обрнува внимание секој ден, а не само на меѓународниот ден на детето.
Ана Минин
