72-годишен пешак загина на лице место откако во него удрил мотоцикл на улицата „Шар планина“ во Скопје, а 22-годишниот мотоциклист е приведен и задржан во полициска станица, информира Министерството за внатрешни работи.
Несреќата се случила вчера, околу 13 часот, кога мотоцикл марка „БМВ“ со бугарски регистарски таблички, управуван од 22-годишниот М.О. од Скопје, удрил во 72-годишниот пешак К.Г., исто така од Скопје. Според информациите од полицијата, од ударот пешакот починал на лице место, а смртта била констатирана од страна на лекар од Итната медицинска помош.
„На местото на настанот веднаш беше упатена увидна екипа на СВР Скопје и јавен обвинител. По извршениот увид, по наредба на јавен обвинител, возачот на мотоциклот е лишен од слобода и задржан во полициска станица за понатамошна постапка“, информираат од МВР.
Од Министерството додаваат дека по целосно расчистување и документирање на случајот, против М.О. ќе биде поднесена соодветна пријава.
