Градежната офанзива за осовременување на патиштата ширум државава, се интензивира и на автопатот Прилеп-Битола. На главниот пелагониски патен „крвоток“, во моментов, се работи на т.н. Секцијата 4, односно на 10-тиот километар од 41 километри долгата траса, која опфаќа и 10 моста, 16 надвозници и 6 подвозници.
„Проектот вклучува повеќр од 5 милиони кубни метри ископ и речиси 4 милиони кубни метри насипен материјал. Во моментов имаме пристап за градежни активности на приближно 10 километри, со работни фронтови кои се шират кон Прилеп и Битола“, – изјави Џошуа Бејкер – проект-менаџер од „Бехтел и Енка“.
Завршувањето на оваа автопатска делница, на Пелагонија ќе и’ донесе значително скратено и безбедно патување, особено што овој регион со години беше сообраќајно „слепо црево“ кое негативно се одразуваше, како на севкупниот економски развој, така и на сообраќајната безбедност, сметаат градоначалниците од Прилеп, Битола и Могила кои денеска извршија увид во градежните работи.
„Оваа инфраструкрура не значи само дел од Коридор 10Д, туку е и од огромно значење за напредокот во Пелагонскиот регион со поврзување на Прилеп-Битола и сите соседни населени места со тоа што ќе им овозможиме побрз пристап на селата кон градовите. Исто така, со реализирање на овој проект, нашите потенцијални инвеститори, кои што сакаат да инвестираат во Пелагонискиот регион, ќе имаат побрз и побезбеден пристап до нашите индустриски зони“, – кажа Борче Јовчески, градоначалник на Прилеп.
„Тука, на 15-тина километри од Битола е и Грција, нашиот европски сосед, и ако на ова се надоврзе она што ЈПДП го планира – од петлата Могила, со негде 17 км, нов спој со границата со Грција, тоа уште повеќе ја зголемува вредноста на овој автопат“, – посочи Тони Коњановски, градоначалник на Битола.
„Патувањето кое ќе се скрати за Битола е едно од бенефитите, но еве морам да напоменам за Могила, на само 5 км од првата клучка имаме Индустриска зона која веќе 80 посто е распродадена, тоа е еден импакт за економскиот развој“, – рече Слободанчо Саботковски, градоначалник на Могила.
И покрај проблемот соекспропријацијата, присуството на стари експлозивни средства и археолошките наоѓалишта долж трасата, очекувањата на „Бехтел и Енка“ се дека овој проект ќе биде завршен согласно Договорот, односно до 2027 година.
