Руската противвоздушна одбрана собори украински беспилотни летала над руските региони Тула и Белгород, соопшти утрово руското Министерство за одбрана, без да прецизира дали има штета или жртви. Два беспилотни летала се уништени од воздушната одбрана над регионот Тула, јужно од Москва, се вели во соопштението на руското Министерство за одбрана на Телеграм.
Уште едно беспилотно летало е уништено од руската противвоздушна одбрана над регионот Белгород, кој се граничи со Украина, синоќа околу 23 часот по московско време, соопшти Министерството во посебно соопштение. Министерството не соопшти дали има штета или жртви како резултат на некој од инцидентите.
Главниот град и другите руски региони беа цел на серија напади со украински беспилотни летала во последните денови, откако Киев вети дека ќе го „врати конфликтот“ на Русија претходно ова лето.
