Откако ВМРО-ДПМНЕ им остави „бланко карта„ да се договорат па да кажат што сакаат, сега СДСМ и Левица се испокараа меѓусебе. Откако партијата на Филипче ја одби покана на Апасиев за заедничка средба со образложение дека не сакале да му прават услуга на Мицкоски во неговата кампања за предвремени избори, Левица возврати – СДСМ е против една изборна единица, зошто мисли дека така ќе го одложи сопствениот распад.
- Во текот на целата дебата за Изборниот законик, СДСМ не изгради ниту една препознатлива политичка позиција за суштинските прашања. Наместо да објаснат дали се за една изборна единица, дали секој глас треба да вреди еднакво и дали Македонија конечно треба да добие поправеден изборен систем, тие упорно се обидуваат дебатата да ја сведат на конспиративни теории, се вели во соопштението на Левица.
Како што е познато, СДСМ ја одби средбата тврдејќи дека станува збор само за обична престава со која му се прави услуга на ВМРО-ДПМНЕ во неговата кампања за предвремени избори. Не го кажаа ставот за една изборна единица, но побараа странска експертиза за гласањето на нашите граѓани со привремен претстој во странство. Тврдат дека тезата на власта дека опозицијата се повлекува од преговорите за Изборниот законик затоа што се плаши од избори и пораз, е нелогична и лесно разоткриена.
- Ако ВМРО и Мицкоски се толку силни како што тврдат, зошто толку инсистираат на закон кој овозможува неконтролирана кражба на гласовите од дијаспората? Ако се толку убедени во својата победа, зошто им е потребна изборна манипулација? Фактите се јасни: ВМРО изгуби над 150.000 гласови на последните избори. Рејтингот на Мицкоски е на историски минимум поради секојдневните лаги и неисполнети ветувања, велат од СДСМ.
Додека СДСМ и Левица се препукуваат, по цели четири месеци преговарање, измените во Изборниот законик остануваат блокирани. Владеачката ВМРО-ДПМНЕ остнува на ставот дека ќе прифатат секаков заеднички предлог од опозициските партии во парламентот, но повлекуваат линија на гласањето на иселениците. За нив, несериозно е по периодот од 4 месеци поминати во преговори, допрва да се бараат експерти од странство.
-Доаѓаме до заклучок дека опозициските партии не сакаат нов изборен законик, туку сакаат блокада, со месеци се преговараше, над четри месеци, па кога требаше да се поднесе законот се повлекуваа со што заклучуваме дека опозицијата нема интерес овој закон да биде донесен и да го оствариме последниот бенчмарк што го имаме од реформската агенда, изјави пратеникот на ВМРО-ДПМНЕ, Бојан Стојановски.
Од владејачката партија порачаа и дека најголемата последица од блокирањето на Изборниот законик од страна на СДСМ, Левица и ДУИ ќе ја почувствуваат македонските граѓани кои живеат надвор од државата. Изборниот законик е дел од реформската агенда на патот кон ЕУ. Крајниот рок да се испорачаат резултатите е 15 јули. Македонија доби пофалби за досега сработеното, но очигледно дека блокадите на изборниот законик од страна на опозицијата ќе го направат успехот нецелосен. Напредокот во реформската агенда и носи повеќе пари на Македонија од планот на раст на ЕУ. Сепак од Брисел предупредија дека изборниот законик треба да се донесе оти станува збор за многу важно прашање не само за Македонија, туку и за Унијата.
