Со симболичен подарок, локалните власти во Општина Богданци го наградија младиот математичар Коста Попристовски поради неговите математички успеси. На денешната средба со градоначалникот Блаже Шапов, талентираниот ученик прими честитки за своите успеси и му се укажа благодарност поради тоа што е вистинска гордост на Богданци.
Последното големо признание Коста го освои на Интернационалниот математички натпревар „Математика без граници“, одржан на 6 јули во Несебар, Бугарија, со учество на ученици и натпреварувачи од 42 држави. Во силна меѓународна конкуренција, Коста ја освои шампионската титула во категоријата алгебра „Лудвико Ферари“, и со тоа, како што велат од Општината, потврди дека талентот, знаењето и посветеноста носат врвни резултати.
– Со особено задоволство денес во мојот кабинет го пречекав нашиот млад и исклучително талентиран математичар. Како знак на почит и благодарност за неговите достигнувања, му врачив симболичен подарок, со желба ова да биде само уште еден чекор кон нови успеси. Средбата ја заокруживме со пријателска партија шах, која заврши нерешено – реми, уште една потврда за неговото стратешко размислување, се вели во информацијата од Општина Богданци.
Коста е ученик во ООУ „Петар Мусев“ во Богданци. На натпреварот “Математика без граници“, освои златен медал, прво место и победнички пехар во категоријата „Лудвико Ферари“. Тој зад себе веќе има низа државни и меѓународни успеси по математика, физика и шах.
