Очајни за храна, вода и засолниште, повеќе од два милиони цивили во Газа бараат спас од престојната офанзива на израелската војска.
Израелската војска ја одложи планираната копнена офанзива во Појасот Газа за неколку дена поради лошите временски услови.
Копнената офанзива требаше да започне овој викенд, но беше одложена поради облачното небо што ќе им отежне на израелските пилоти и операторите на беспилотните летала да им пружат воздушна поддршка на копнените сили, објави Њујорк тајмс, повикувајќи се на високи израелски офицери.
Дека ситуацијата е загрижувачка предупреди и Светската здравствена организација.Од таму, алармираат дека принудувањето на илјадници пациенти во Појасот Газа да се евакуираат во веќе преполните болници може да биде „смртна казна“ за нив.
„СЗО силно ги осудува повторените израелски наредби за евакуација на 22 болници кои згрижуваат повеќе од 2.000 лежечки пациенти на северот на Газа. Присилната евакуација на пациентите и здравствените работници дополнително ќе ја влоши хуманитарната и здравствената катастрофа“, се вели во соопштението на СЗО.
Израелската војска сè уште им дозволува на цивилите во Газа да бегаат на југ, судири има и на границата со Либан.
Израел вети дека ќе ја уништи милитантната група Хамас откако нејзините борци дивееја низ израелските погранични градови, пукаа во мажи, жени и деца и зедоа заложници, при што загинаа илјадници луѓе, што е најлошиот напад врз цивили во историјата на земјата.
Од почетокот на војната меѓу Хамас и Израел, бројот на убиени во појасот Газа надмина 2.300, а повеќе од 9.000 се ранети.
Газа веќе се соочува со хуманитарна криза поради зголемениот недостиг на вода, храна и медицински материјали како резултат на израелската блокада, што предизвика и затворање на единствената електрана поради недостиг на гориво.
