На телевизија Алфа гостуваше претседателот на УМС на ВМРО-ДПМНЕ, Тодор Конески кој на самиот почеток истакна дека мерката за студентско практикантство во локалните самоуправи има за цел да им овозможи на младите стекнување практично искуство, при што студентите во текот на август и септември ќе можат да бидат практиканти во општините од кои доаѓаат, информира ВМРО-ДПМНЕ.
Според него, иницијативата, која се реализира под водство на Министерството за локална самоуправа во соработка со повеќе државни институции и државните универзитети, ќе придонесе младите да стекнат практични знаења, а општините да добијат дополнителна енергија и нови кадри.
„Ова е една нова иницијатива која е под водство на Министерството за локална самоуправа, во соработка со повеќе државни институции, а исто така и со државните универзитети. Мерката предвидува дека за време на месеците август и септември студентите ќе имаат прилика активно да учествуваат, односно да бидат практиканти внатре во локалните самоуправи на своите општини. Визијата позади оваа мерка е да воведеме една реална политика каде што младиот човек ќе можеме да му дадеме практично образование, на општините да им дадеме млада силна енергија. Младите се едни од столбовите на ВМРО-ДПМНЕ, во програмата што ја понудивме пред граѓаните во 2024 имаше голем број на проекти за млади коишто сите сме фокусирани да ги исполниме“, рече Конески и додаде:
„Ако ги гледаме фактите во последните две години имаме тренд на позитивна миграција, прв пат македонските иселеници по подолго време гледаат дека во Македонија има власт којашто работи кон зголемување на потенцијалот економски на државата, зголемување на атрактивноста на државата и гледаме дека државата прв пат после подолго време работи на покревање на економскиот стандард“.
Конески го коментираше и подмладокот на опозицијата, обвинувајќи дека ги повторуваат ставовите на партиското раководство во однос на евроинтегративниот процес и уставните измени. Тој оцени дека младите од опозицијата не ги извлекле поуките од, како што рече, претходните политички одлуки и дека ја следат реториката на партиското раководство.
„Токму тие доаѓаат од структурата која го смени името со ветувањето дека веднаш се отпочнуваат преговорите за Европската Унија, но не се случи тоа, и сега повторно пробуваат да ја сервираат тезата дека со безусловното прифаќање на Бугарите во Уставот, ќе се затвори таа тема и ние преку ноќ ќе станеме полноправна членка на Европската Унија. Многу ми е жал што тие млади луѓе немаат научено ништо, ги немаат научено историските лекции коишто они биле во позиција на одлучување и што слепо ја следат врхушката нивна којашто за жал од ден во ден паѓа во се поголема антимакедонска реторика“, дециден е Конески.
