Целосно го реконструираме мостот „Естакада“ – важна сообраќајна врска за Гази Баба и за цело Скопје, соопшти денеска скопскиот градоначалник Орце Ѓорѓиевски на Фејсбук.
Тој информираше дека денеска со градоначалникот на општина Гази Баба, Бобан Стефковски, го означиле почетокот на санацијата на мостот „Естакада“, појаснувајќи оти станува збор за проект што со години бил барање на илјадници жители и една од најважните сообраќајни точки во овој дел од градот.
– Овој мост има особено значење, затоа што се наоѓа на еден од најфреквентните излези од Скопје и претставува важна врска за граѓаните кои секојдневно се движат кон и од општините што гравитираат во овој дел. Тука минуваат работници, ученици, семејства, компании, транспорт и затоа нашата обврска е оваа сообраќајна артерија да биде безбедна, функционална и достоинствена – нагласи Ѓорѓиевски.
Санацијата опфаќала пристапни рампи на вкупна површина од 10.000 квадратни метри, од кои 3.800 квадратни метри ќе биле целосно обработени со гребење и вградување два нови слоја асфалт, додека на делот од мостот ќе се поставел нов асфалтен слој.
– Дополнително, ќе се изврши замена на рабници, изработка на асфалтни тротоари, чистење, санација и бојадисување на заштитната пешачка ограда, како и замена на постоечките капаци за шахти – додаде градоначалникот.
Вкупната должина на делот што се санирал изнесува 1,5 километри коловоз.
– Ова е вложување во безбедноста, во подобрата поврзаност и во секојдневието на илјадници граѓани. Скопје заслужува модерна, безбедна и функционална инфраструктура. Затоа најавувам дека ќе продолжиме со санација на сите мостови во градот каде што има потреба. Продолжуваме да го градиме Скопје – чекор по чекор, проект по проект, со дела што се гледаат – потенцираше градоначалникот.
