Штип го добива првиот Центар за рехабилитација за деца и младинци со попреченост на Истокот. Завршена е тендерската постапка за избор на фирма, а наскоро ќе започне преадаптацијата на просторот. Со неговото отворање ќе се обезбеди дневна грижа и стручна поддршка за 40 корисници и нивните семејства.
„Согласно динамиката и временскиот рок за изградба, очекувам до крајот на годината истиот да биде изграден, да бидат адаптирани просториите, а веднаш потоа и да биде ставен во функција“, изјави градоначалникот на Штип, Иван Јорданов.
Центарот ќе биде сместен во дел од објектот на Средното текстилно училиште, каде ќе се спроведува рана рехабилитација со поддршка од логопеди, дефектолози и физиотерапевти. Корисниците истовремено ќе развиваат животни вештини за поголема самостојност, а активно ќе бидат вклучени и родителите.
Во иднина е планиран и Центар за младинци, кој ќе се гради меѓу населбите Железничка и Пребег.
„Еден од предлозите е, како општина, да преотстапиме една локација на која, перспективно, Здружението на лица со попреченост ќе има можност преку различни проекти да направи одредена содржина од која ќе имаат корист“, изјави градоначалникот на Штип, Иван Јорданов.
Изградбата и опремувањето на Центарот ќе чинат околу 11 милиони денари. Најголем дел од средствата се обезбедени преку Министерството за социјална политика, демографија и млади, а 11% треба да кофинансира Општина Штип.