Почна реконструкцијата на улицата „Индустриска“, на потегот од улицата „11 Октомври“ до улицата „11 Ноември“, информираше градоначалникот Максим Димитриевски. Проектот се реализира во рамки на вториот владин повик. Како што соопшти Димитриевски предвидена е целосна реконструкција на постојната руинирана асфалтна површина, ќе се изврши вадење на постојните рабници, машински ископ и продлабочување на тампонскиот материјал, поставување нов тампонски слој со машинско набивање.
Реконструкцијата на улицата предвидува и изградба на тротоари, поставување нови бетонски рабници, како и изведба на нов носив и завршен асфалтен слој и поставување сливници за надолжно и попречно одведување на површинските води.
-Со реализација на овој проект значително ќе се подобрат безбедноста, функционалноста и квалитетот на сообраќајната инфраструктура на овој важен патен правец во Куманово- објави Димитриевски.
Сопствениците на фирмите кои работат во една од најстарите индустриски зони во Куманово со години бараа локалната самоуправа да инвестира во подобрување на инфраструктурата на овој потег. Улицата „Индустриска“, која ги поврзува населбите „Железничка станица“ и „Бедиње“, подолг период беше во исклучително лоша состојба, со бројни оштетувања и дупки на коловозот. Поради оштетениот асфалт, возачите и компаниите кои секојдневно ја користат оваа сообраќајница често реагираа дека движењето е отежнато.
