Пелагонските сточари повторно оставени на чекање. Ништо од ветувањата дадени уште на почетокот на април дека до крајот на мај ќе им бидат исплатени субвенциите за лани предаденото млеко, како и по грло добиток. Сега, тие немаат пари за тековните земјоделски работи, а капак на се’, биле и неповолните временски услови кои особено негативно влијаат на собирањето на сточната храна.
„Субвенциите беа ветени дека до крајот на мај ќе ги добиеме за девет месеци по литар предадено млеко. Од тоа нема ништо. Сега имаме голем проблем со преголемите дождови. Сета храна што треба да ја собереме за стоката, мораме дупли трошоци да правиме, да ги мелеме во сенажа. А сенажата е многу скапа работа. Еден хектар чини 250 евра само комбајнот, плус другите трошоци“, вели ТОНИ ПЕТКОВСКИ, сточар од с. Велушино, битолско.
Според Петковски, ако во најбрзо време не им бидат исплатени субвенциите, многу сточари ќе останат без храна за стоката, а која треба да се собере најдоцна во овие 25 дена. „Тоа негативно ќе се рефлектира на и онака намалениот сточен фонд, кој ќе продолжи да се намалува, но и на количините домашна храна за луѓето која ќе ја има се’ помалку“, предупредува Петковски.
„Моментално, иди од еден хектар од 8.00 до 1.000 евра за да се сомеле. А тоа ни е последна шанса што досега помалите сточари таа работа не ја правеа, а сега сме принудени. Во маркетите ќе имаме некоја заразена увозна или полска, или унгарска или било која храна. Нема да најдеме македонско производство“, – објаснува Петковски.
Инаку, пелагонсиките сточари на оваа состојба предупредија уште пред речиси два месеци кога организираа и мирен протест пред битолската ПЕ за земјоделие и побараа итна исплата на заостанатите субвениции, како и на персоналниот данок за две години. Тогаш, од Платежната агенција ни беше речено дека дека во соработка со АХВ во тек била постапката за утврдување на веродостојноста на пријавените грла добиток и дека кај 424 сточари на ниво на Македонија биле утврдени извесни неправилности. „Прво се исплаќа основното стадо, а дури потоа субвенциите за млеко. Откако ќе ги расчистиме сите овие контроли и мерки, ќе пристапиме кон решавање на субвенциите за млеко“, ни рече во април, директорот на Платежната агенција, Никица Бачовски, без да прецизира кога точно ќе се случи тоа.
Каролина Дурло
