Општина Ѓорче Петров ќе обезбеди 2.720.000 денари за поддршка на проекти од областа на културата во 2026 година, преку Јавниот повик за финансирање на културни програми и иницијативи.
Со предвидените средства, како што информираат од локалната самоуправа, ќе биде реализирана разновидна културна програма наменета за сите генерации, со цел збогатување на културниот живот во општината и поттикнување на креативното изразување.
Во рамки на програмата се предвидени концерти под отворено небо, театарски претстави, кино под отворено небо, изложби, креативни работилници, базари, фестивалски содржини и други културни настани што ќе ги оживеат јавните простори и ќе создадат нови можности за дружење, творештво и културно изразување.
Од Општина Ѓорче Петров посочуваат дека остануваат посветени на развој на динамична културна сцена, поддршка на локалните иницијативи и создавање можности за достапна култура и активен јавен живот за граѓаните.
