Општина Охрид продолжува со реализација на инфраструктурни проекти за подобрување на комуналните услови во градот, при што во тек е доизградба на атмосферски канал на улицата „АСНОМ“ во станбениот комплекс „Бејбунар“, а завршено е партерното уредување на дел од улицата „Шар Планина“.
Како што соопшти на својот фејсбук-профил градоначалникот Кирил Пецаков, проектот на улицата „АСНОМ“ опфаќа изградба на 400 метри цевковод „ПЕФ 630“, со вредност од 4.353.247 денари. Работите ги изведува ЈП „Нискоградба“, по налог на Општина Охрид, со средства обезбедени од општинскиот буџет.
Паралелно, екипите на ЈП „Нискоградба“ извршиле поплочување со бехатон-плочки на површина од 1.200 квадратни метри на дел од улицата „Шар Планина“.
Вредноста на тој проект изнесува 2.964.337 денари, појасни Пецаков.
