Во селото Туминец, Општина Пустец на 29 јули ќе се одржи фолклорниот фестивал „ПРЕСПА”, што се совпаѓа со одбележувањата на патронот на познатиот манастир „Света Марена”.
Покровител на овој значаен настан е премиерот Христијан Мицкоски а се одржува во организација на Македонското друштво “Преспа”, Здружението „ВМРО ДПМНЕ АЛБАНИЈА” и Општина Пустец.
-Македонскиот фолклорен фестивал „ПРЕСПА“ повторно ги обединува Македонците преку песната, орото и вековната традиција. Македонската песна ќе одекне, ќе се вие македонско оро а нашата традиција ќе нè обедини како едно, рече за МИА, Едмонд Темелко, претседател на МД „Преспа”.
Додаде дека почетокот е во 18 часот а фестивалот се одржува под мотото „Македонија обединува” и порачува дека „фолклорот ги чува корените, традицијата ја гради иднината.“
-Ќе настапат фолклорни ансамбли и културно-уметнички друштва од Република Македонија или Вардарска Македонија, Егејска и Пиринска Македонија и Мала Преспа. Добредојдени се сите, за да заедно да ја исполниме Мала Преспа со македонска песна, оро, знамиња и гордост. Да покажеме дека македонскиот дух живее, а нашата традиција продолжува да ги обединува генерациите – порачува Темелко.
Селото Туминец е едно од деветте населени места на Општина Пустец. Се наоѓа на самиот брег на Преспанското Езеро, во близина на граничниот премин Стење – Горица и е второ село по големина, со околу 600 жители.
Манастирот „Света Марена“ по која е препознатливо селото датира од 18 век, а обновен е во 1926 година. Се наоѓа на самиот брег од Преспанското Езеро, покрај местото наречено Писан Камен, локација која самата по себе му дава дополнителна убавина и привлечност. Во него се наоѓаат поголем дел од моштите на Светицата каде сè уште се случуваат чуда над нејзините мошти.
Патронот на манастирот е на 30 јули а традиционално одбележувањето почнува ден порано со присуство на голем број верници од оваа општина, иселеници од областа кои во летниот период доаѓаат во родното место, Округот Корча, но и од соседните земји.
