Еден ден контра жените во политиката, друг ден ретерира и се бори за земјоделките. Пратеникот од редовите на СДСМ, Фатмир Битиќи кој пред два дена ја нарече министерката за финансии Гордана Димитриеска Кочоска сметководителка која ја води државата во бездна денеска бараше пари за жените коишто вршат земјоделска дејност. Токму министерката која вербално ја омаловажи му го прифати амандманот на ребалансот на буџетот за плус 2 милиони денари.
Вчера, на изјавата на Битиќи реагираа и од Советот за унапредување и надзор на сметководствената професија. Оттаму го осудуваат потегот и бараат извинување. Сметаат дека тој го користел статусот сметководител во негативен контекст, а со намера да ја омаловажи министерката. Според нив, не смее да се дозволи, во недостаток на економски аргументи за дебата, да се посегнува кон понижување на една цела професија. Од Советот додаваат дека сметководителите се од витално значење за државата и се луѓе кои го носат товарот на даночниот и фискалниот систем на државата.
Пратениците од матичната комисија за Финансирање и буџет одобрија уште еден амандман за поддршка за жените, поточно дополнителни 2 милиони денари за СОС линијата за жртвите на родово и семејно насилство. Амандманот беше поднесен од политичката партија Левица.
Инаку, општата расправа за ребалансот на буџетот започна на 3 јули, и по тридневна расправа во Комисијата започна амандманската распава. Поднесени се вкупно 224 амандмани.
