Градоначалникот на Куманово, Максим Димитриевски, денеска побара од надлежните институции итно да го расветлат случајот со вандализирањето на просториите на културно-уметничкото друштво „Српски вез“ и сторителите да бидат изведени пред лицето на правдата.
-Најостро го осудувам вандализирањето на просториите на КУД „Српски вез“ во Куманово. Барам од органите на истрагата да го утврдат идентитетот на сторителите и да ги изведат пред лицето на правдата- порача Димитриевски.
Тој нагласи дека Куманово отсекогаш било препознатливо по мултикултурниот дух и соживотот меѓу граѓаните, додавајќи дека ваквите инциденти не ги одразуваат вредностите на градот.
-Куманово отсекогаш бил град на мултикултура и соживот, таков и ќе остане. Ваквите дејствија не се патриотизам, туку чист шовинизам кој подгрева национална нетрпеливост, против која се сите граѓани на Куманово- истакна градоначалникот.
