Градоначалникот на Скопје Орце Ѓорѓиевски го посетил MUNI EXPO во Тел Авив, еден од најзначајните меѓународни настани посветени на локалната самоуправа, паметните градови, урбаните иновации и современото управување со кризи.
На настанот, на кој бил заедно со градоначалникот на Штип, Иван Јорданов, присуствувале претставници на градови од светот, општини, институции и компании со можност да разменуваат искуства за тоа како локалната власт може да биде побрза, поефикасна и поблиску до граѓаните.
Ѓорѓиевски го посетил MUNI EXPO на покана на Државата Израел и амбасадорката на Израел во земјава, Вивиен Ајзен, и на Фејсбук објави дека е „особено значајно е да се видат израелските искуства во управување со податоци, дигитални услуги, комунални решенија и координација во кризни ситуации“.
-Скопје мора да учи од најдобрите практики, да се отвора кон современи решенија и да гради град кој ќе биде функционален, уреден и подготвен за предизвиците на иднината. Изразувам искрена благодарност за поканата и можноста да бидам дел од овој значаен настан, кој отвора простор за размена на искуства, нови идеи и конкретни решенија за подобро функционирање на градовите. Продолжуваме со посветена работа за модерно, организирано и европско Скопје, напиша скопскиот градоначалник на својот фејсбук-профил.
