Хаваи претворено во пекол. Најмалку 36 лица загинаа, а десетици се повредени во катастрофалните пожари кои ги зафатија овие рајски острови. Огнот брзо се ширеше пред се на островот Мауи. Целосно е уништен историскиот град Лахаина омилен на туристите.
Луѓе влегувале во океанот за да избегаат од огнот. Од крајбрежната стража биле спасени десетина лица. Повеќе стотици семејства останаа без покрив над главата. Западниот дел од островот нема струја ниту телефонски врски, а од туристите се бара побргу да си заминат.
За брзото ширење на пламените јазици според властите виновен е ураганот Дора. Претседателот Џо Бајден вети помош во евакуацијата и во справувањето со пожарите во оваа Сојузна американска држава.
– Фактот дека имаме шумски пожари во повеќе области кои индиректно се припишуваат на ураган, е без преседан. Тоа е нешто што жителите на Хаваи и државата не го доживеале“, изјави заменик-гувернерката Силвија Лук.
Грчката полиција сомничи 29 годишен навивач на Панатинаикос дека го убил неговиот врсник симпатизер на ривалскиот клуб АЕК, а за што претходно беа обвинети навивачите за Динамо од Загреб.
Според медиумите во Грција ДНК тестирањето покажало дека траги од главниот осомничен биле најдени на телото на убиениот навивач. Тој и бил познат на полицијата бил во затвор, а последните 6 месеци издржувал затворска казна.
За хулиганскиот инцидент уапсени се 100-тина хрватски навивачи и тројца Грци. Тамошната полиција денеска го покажа пронајденото оружје кое двете групи го користеле во масовната тепачка.
Претседателот Џо Бајден потпиша извршна наредба за забрана на американски инвестиции во кинеска технологија. Ограничувањето е во три сектори: полупроводници и микроелектроника, квантни информатички технологии и одредени системи за вештачка интелигенција.
Бајден во писмо до Конгресот рече дека прогласува национална вонредна состојба за да се справи со заканата од напредок од страна на земји како Кина „во чувствителните технологии и производи од клучно значење за војската, разузнавањето, надзорот или способностите овозможени од сајбер.
Официјалкен Пекинг овој чекор го осуди и го оквалификува како кршење на принципите на пазарна економија и фер конкуренција. Најавија дека внимателно ќе го следат развојот на настаните, а според нив целта била Вашингтон да ја лиши Кина од правато на развој.
