Хаос во Зоолошка градина – Скопје. Опасни бели волци избегале од своето живеалиште и ги нападнале животните од околните кафези. Инцидентот се случил во саботата. Ископале дупка под својот кафез, убиле четири кенгури, а нападнале и неколку ему птици. Според неофицијални извори, алфа телевизија дознава дека по неколкучасовната брканица со вработените, тие ги фатиле овие крволочни животни и ги вратиле назад во своето живеалиште- повредени нема..Од зоолошката градина ниту ја потврдуваат ниту ја демантираат информацијата, директорката не одговара на повиците, а недостапни се и дел од вработените кои ги контактираше Алфа. Невладините организации и здруженија веднаш реагираа. Од Анима Мунди бараат итна истрага, транспарентност и санкции за одговорните.
И не, не е несреќен случај. Ова е алармантен показател за системски колапс, негрижа и отсуство на професионално управување со институција која чува живи суштества зад решетки и за која постојано се издвојуваат јавни средства.
Итно и јавно да се истражи колку време бил компромитиран просторот од кој избегале волците? Кој бил задолжен за надзор? Кога последен пат биле извршени безбедносни проверки? Зошто не биле применети протоколи за спречување на трагедијата?
Пред два месеци скопската зоолошка градина одбележа 100 години постоење. Новата директорка тогаш кажа дека зоолошката ја затекнала во катастрофална состојба. Најави нови инвестиции и модернизација, со цел подобрување на условите, реновирање на старите живеалишта и враќање во Европската асоцијација на зоолошки градини. Во ЗОО има околу 500 животни од 100 видови, а градината е основана во 1926 година.
Мила Тодорова
