Од денеска граѓаните на Општина Чешиново-Облешево имаат на располагање бесплатен јавен Wi-Fi, поставен во рамки на иницијативата WiFi4WB, која е финансирана од Европската Унија и Владата на Сојузна Република Германија, а се спроведува од GIZ како дел од проектот EU4Digital.
Градоначалникот Јорданчо Костадинов изјави дека целта на иницијативата е да се обезбеди бесплатен јавен интернет за граѓаните во државите од Западен Балкан, меѓу кои и Македонија.
-Нашата Општина ќе биде една од 500 во регионот кои добиваат WiFi4WB мрежа, по примерот на EU програмата WiFi4EU, која обезбеди бесплатен јавен интернет на 7.000 локации низ Европската Унија- дополни градоначалникот Костадинов.
Сите граѓани и посетители можат да се поврзат бесплатно и да користат сигурна интернет врска доколку се најдат во близината на општинската зграда или во и околу паркот во Облешево.
-Со оваа поддршка, Општина Чешиново-Облешево продолжува да ги унапредува јавните услуги и да ја зајакнува дигиталната поврзаност на локалната заедница- смета Костадинов.
