ЗЕТА – Здружение за попреченост и правда од Скопје беше домаќин на десет жени од Финска, учеснички во добротворната кампања „Капуа 2026 Македонија“ (Kapua 2026 North Macedonia), како и на претставници на финската организација за права на лицата со попреченост „Кунус“ (Kynnys / Праг).
Во текот на дводневната посета, гостите се запознаа со работата на ЗЕТА и со активностите што организацијата ги спроведува за унапредување на правата на лицата со попреченост и остварување на правото на независен живот. Дел од програмските активности на ЗЕТА се реализираат во рамките на програмата „Унапредување на социјалната инклузија и застапувањето за правата на лицата со попреченост во регионот на Западен Балкан“, којашто ја спроведуваат ЛОТОС од Босна и Херцеговина и ЗЕТА – Здружение за попреченост и правда од Македонија.
Посетата се совпадна со почетокот на новата учебна година, па претставниците на „Капуа“ и „Кунус“, заедно со ЗЕТА и ДСУРЦ „Партенија Зографски“ – Скопје, го одбележаа првиот училиштен ден со учениците од училиштето.
Во рамките на средбата беше организирана и креативна работилница, каде што преку цртање беше создадена заедничка творба посветена на образованието и асистенцијата. Преку заедничко творење беше испратена порака за значењето на инклузивното образование, поддршката и еднаквите можности за лицата со и без попреченост, како предуслови за поголема самостојност и вклученост во заедницата. По посетата, десетте учеснички од Финска ја продолжуваат својата мисија со шестдневна планинарска експедиција низ Македонија, чијашто крајна цел е искачување на Голем Кораб, највисокиот врв во земјата, висок 2.764 метри.
Експедицијата е дел од добротворната кампања „Капуа“, со цел собирање средства за поддршка на проекти насочени кон унапредување на човековите права и еднаквоста, со посебна нагласка на жените и младите со попреченост.
Височината на Голем Кораб е симболично поврзана со добротворната акција. Секоја од десетте учеснички има за цел да собере по 5.528 евра – по две евра за секој метар до врвот на Кораб. Заедничката цел на групата е да се соберат 55.280 евра за поддршка на проектите опфатени со кампањата.
