Здружението на производители на органски производи од Делчево го спроведува проектот „Растителниот отпад – ресурс за производство на биохрана“, поддржан од Европската унија. Во рамки на предвидените активности се одржа обука за практично директно компостирање во т.н. перма-модели, како пример за реупотреба на растителниот отпад од градините и домаќинствата.
Претседателот на Здружението, Фиданчо Христов, истакна дека целта на обуката е на учесниците да им се прикаже комплетната процедура за подготовка на перма-модел, селекција на отпадот и садење на земјоделските култури.
-Тема на обуката е директно компостирање по перма-модели како пример за производство на биохрана со реупотреба на растителниот отпад. Најпрво како дренажа се става кабаст материјал и гранки, потоа сено, малку арско ѓубре како активатор, а потоа се става собраниот растителен отпад од домаќинството и градината. Ваквото производство овозможува секој граѓанин дури и на 10 квадратни метри во сопствениот двор да произведе храна за сопствените потреби“, изјави Христов.
Тој додаде дека ваквиот пристап носи двојна придобивка – овозможува производство на здрава органска храна и директно придонесува за заштита на животната средина преку намалување на отпадот што завршува на депониите и емитува метанот и други стакленички гасови.
На обуката беа подделени и соодветни прирачници и материјали со практични совети и рецепти за комбинирање на културите кои меѓусебно се заштитуваат.
